சொத்து வரி 6 சதவீதம் உயா்வு: மேயருடன் வாா்டு உறுப்பினா்கள் வாக்குவாதம்
6 சதவீத சொத்து வரி உயா்வை ரத்து செய்ய வலியுறுத்தி மேயருடன் அதிமுக, கம்யூனிஸ்ட் வாா்டு உறுப்பினா்கள் வாக்குவாதத்தில் ஈடுபட்டனா்.
கோவை மாநகராட்சி அலுவலகத்தில் உள்ள விக்டோரியா ஹாலில் மேயா் கா.ரங்கநாயகி தலைமையில் மாநகராட்சி மாமன்றக் கூட்டம் புதன்கிழமை நடைபெற்றது.
இக்கூட்டத்துக்கு மாநகராட்சி ஆணையா் மா.சிவகுரு பிரபாகரன் முன்னிலை வகித்தாா். கூட்டத்தில், வளா்ச்சித் திட்டப் பணிகள் தொடா்பாக 86 தீா்மானங்கள் நிறைவேற்றப்பட்டன.
இதில், பூங்கா, பொதுக் கழிப்பிடம், ஈஷா சாா்பில் மின் மயானங்கள் பராமரிப்புப் பணி உள்ளிட்ட பல்வேறு பணிகளுக்கு ஒப்பந்தம் கோருவதற்கான தீா்மானம் குறித்து வாா்டு உறுப்பினா்கள் எதிா்ப்பு தெரிவித்தனா். இதையடுத்து, அந்த தீா்மானங்கள் ஒத்திவைக்கப்பட்டன.
தொடா்ந்து, 6 சதவீத சொத்து வரி உயா்வு தீா்மானத்தை வாபஸ் பெற வேண்டும். கட்டட வரைபட அனுமதி கட்டண உயா்வை ரத்து செய்ய வேண்டும் என மேயரிடம் அதிமுக, மாா்க்சிஸ்ட் கம்யூனிஸ்ட், இந்திய கம்யூனிஸ்ட், மதிமுக வாா்டு உறுப்பினா்கள் வாக்குவாதத்தில் ஈடுபட்டனா். அப்போது, சொத்துவரி உயா்வை ரத்து செய்ய அரசிடம் பேசி தீா்வு காணப்படும் என மேயா் கா.ரங்கநாயகி பதிலளித்து அவா்களைச் சமாதானப்படுத்தினாா்.
இதையடுத்து, 26-ஆவது வாா்டு உறுப்பினா் சித்ரா வெள்ளிங்கிரி பேசுகையில், கோவை மாநகராட்சியில் 6 சதவீத சொத்து வரி உயா்வுடன், வரி செலுத்தாதவா்களுக்கான ஒரு சதவீத அபராத வரியையும் முழுமையாக ரத்து செய்ய வேண்டும். தூய்மைப் பணியாளா்களை அதிகப்படுத்தி குப்பைகள் தேங்கும் பிரச்னைக்கு நிரந்தர தீா்வு வேண்டும். தற்போது பெய்து வரும் மழையால் வீடுகளுக்குள் மழை நீா் புகுந்து விடுகிறது. எனவே, மழைநீா் வடிகாலை முறையாக தூா்வார வேண்டும் என்றாா்.
71-ஆவது வாா்டு உறுப்பினா் அழகு ஜெயபாலன் பேசுகையில், தெருநாய்களுக்கு முறையாக கருத்தடை செய்ய வேண்டும். சாஸ்திரி மைதான ஆக்கிரமிப்புகளை அகற்றிவிட்டு பல்முனை விளையாட்டு மைதானமாக மாற்ற வேண்டும் என்றாா்.
கிழக்கு மண்டலத் தலைவா் இலக்குமி இளஞ்செல்வி பேசுகையில், மாநகரப் பகுதிகளில் நெகிழிப் பொருள்கள் புழக்கத்தைக் கட்டுப்படுத்த நடவடிக்கை மேற்கொள்ள வேண்டும். இதேபோல, குண்டும் குழியுமான சாலைகளைச் சீரமைக்க வேண்டும், சீரான குடிநீா் விநியோகிக்க வேண்டும் என்றாா். தொடா்ந்து, பல்வேறு வாா்டு உறுப்பினா்கள் தங்களது கோரிக்கைகளை முன்வைத்தனா்.
இதையடுத்து, மாநகராட்சி ஆணையா் மா.சிவகுரு பிரபாகரன் பேசியதாவது: தெருநாய்கள் பிடிப்பது தொடா்பாக அந்தந்த வாா்டு உறுப்பினா்களுக்கு தகவல் தெரிவிக்கப்பட்டு, அவா்களின் கையொப்பம் பெறுவது அமல்படுத்தப்படும்.
தெரு நாய்களுக்கு கருத்தடை அறுவைச் சிகிச்சை மேற்கொள்ளப்பட்டு, பிடிக்கப்பட்ட இடத்திலேயே அவை விடப்படுகின்றன என்றாா்.
அதிமுகவினா் போராட்டம்: மாமன்றக் கூட்டத்தில் பங்கேற்க அதிமுக வாா்டு உறுப்பினா்கள் ஷா்மிளா, ரமேஷ், பிரபாகரன் ஆகியோா் வந்திருந்தனா். அப்போது, மூவரும் மாநகராட்சி வளாகத்தில் முக்காடு அணிந்தபடி நின்று சொத்து வரி உயா்வைக் கண்டித்து கோஷமிட்டனா்.
இது குறித்து, 47-ஆவது வாா்டு உறுப்பினா் பிரபாகரன் செய்தியாளா்களிடம் கூறியதாவது: மே மாதத்தில் மக்களவைத் தோ்தல் நடைபெற்ால் மக்களின் வாக்குகளைப் பெறுவதற்காக, அப்போது வரிகள் ஏற்றப்படவில்லை. அதற்குப் பதிலாக செப்டம்பரில் வரியினங்கள் உயா்த்தப்பட்டுள்ளன. அதிமுக ஆட்சியில் சதுர அடிக்கு ரூ.40 ஆக இருந்த சொத்து வரி, திமுக ஆட்சியில் ரூ.80 ஆக உயா்த்தப்பட்டுள்ளது. இது மக்களை வஞ்சிக்கும் செயல் என்றாா்.