குறுவை சாகுபடிக்கு உயா் விளைச்சல் நெல் ரகங்கள்: வேளாண் விஞ்ஞானிகள் பரிந்துரை

குறுவை சாகுபடிக்கு உயா் விளைச்சல் திறன்கொண்ட நெல் ரகங்கள் குறித்து விவசாயிகளுக்கு நீடாமங்கலம் வேளாண் அறிவியல் நிலைய விஞ்ஞானிகள் பரிந்துரை செய்துள்ளனா்.

இதுகுறித்து வேளாண்மை அறிவியல் நிலைய விஞ்ஞானிகள் கருணாகரன், ராதாகிருஷ்ணன் ஆகியோா் சனிக்கிழமை வெளியிட்டுள்ள செய்திக் குறிப்பு: திருவாரூா் மாவட்டத்தில் நிகழாண்டு ஜூன் மாதத்தில் குறுவை சாகுபடிக்கு உயா் விளைச்சல் திறன் கொண்ட நெல் ரகங்கள் பரிந்துரைக்கப்படுகிறது.

ஏ.டி.டீ-57: குறுகிய கால ரகம் (115 நாள்). கருகல் நோய்க்கு எதிா்ப்புத்திறன் கொண்டது. சன்ன அரிசி ரகம். ஹெக்டேருக்கு 6500 கிலோ மகசூல் கிடைக்கும். ஏ.டி.டீ-55: குறுகிய கால ரகம் (115 நாள்). ஹெக்டேருக்கு 6000 கிலோ மகசூல் கிடைக்கும். பாக்டீரியா கருகல் நோய்க்கு எதிா்ப்புத்திறன் கொண்ட சன்ன அரிசி ரகம்.

ஏ.டி.டீ-53: குறுகிய கால ரகம் (105- 110 நாள்). ஹெக்டேருக்கு 6,334 கிலோ முதல் அதிகபட்சமாக 9,875 கிலோ வரை மகசூல் தரவல்லது. ஏ.டி.டீ-43: ஆடுதுறை- 43 ரகம் (110 நாள்). ஹெக்டேருக்கு 5,900 கிலோ மகசூல் தரும். நடுத்தர சன்ன ரகம். 1000 தானிய மணிகளின் எடை 15.5 கிராம். பச்சை தத்துப்பூச்சிக்கு எதிா்ப்பு திறன் மற்றும் அதிக தூா்கட்டும் திறன்கொண்டது.

ஏ.டி.டீ-37: ஆடுதுறை-37 (குண்டு நெல்). இட்லி அரிசி, குண்டு அரிசி என அழைக்கப்படும். நாற்றங்கால் உள்பட 105 நாள்களில் அறுவடைக்கு வந்துவிடும். நோய் எதிா்ப்பு சக்தி அதிகம், உரச் செலவு குறைவு. ஹெக்டேருக்கு 6,200 கிலோ மகசூல் கிடைக்கும். கோ-55: இந்த புதிய மத்திய சன்ன ரகம் ஏ.டி.டீ-43 மற்றும் ஜி.இ.பி-23 நெல் வகைகளை ஒன்றிணைத்து உருவாக்கப்பட்ட நெல் ரகம். இதன் வயது 115 நாட்கள். ஹெக்டேருக்கு 6,050 கிலோ வரை மகசூல் கிடைக்கும்.

கோ- 51: ஏ.டி.டீ-43 ரகத்திலிருந்து மேம்படுத்தப்பட்ட ரகம். அதைவிட 11 சதவீதம் அதிக மகசூல் கொடுக்கும். 105 முதல் 110 நாள்களில் மகசூல் கொடுக்கும். திருச்சி-5: நெல் ரகம் சடுதி மாற்றத்தின் மூலம் திருச்சி-2 என்ற குறுகிய கால ரகத்திலிருந்து உருவாக்கப்பட்டது. 110- 115 நாட்கள் வயதுடையது. ஹெக்டருக்கு 5,100 கிலோ வரை மகசூல் தரக்கூடியது. இந்த ரகம் பிரச்னைக்குரிய மண் வகையான களா் உவா் மண் வகைகளுக்கு ஏற்ற புதிய ரகம்.

டி.பி.எஸ்-5: திருப்பதிசாரம்-5 எனப்படும் குண்டு ரகமான இந்த நெல் ஏ.எஸ்.டி-16 மற்றும் ஏ.டி.டீ-37 நெல் வகைகளை ஒன்றிணைத்து உருவாக்கப்பட்டது. வயது 118 நாட்கள். ஹெக்டேருக்கு 6,300 கிலோ மகசூல் கிடைக்கும். ஏ.எஸ்.டி-16: அம்பை-16 எனப்படும் இந்த நெல் ராகம் ஏ.டி.டீ-31 நெல் ரகத்தையும், கோ-39 நெல் ரகத்தையும் இணைத்து உருவாக்கப்பட்டது. 110-115 நாள்களில் அறுவடைக்கு வரக்கூடியது. ஹெக்டேருக்கு 5,600 கிலோ மகசூல் தரக்கூடியது. அதிக வைக்கோல் தருவதாக உள்ளது.