அமலாக்கத்துறை விசாரணைக்கு ஆஜரானார் ராப்ரி தேவி!

ரயில்வே வேலைக்காக நிலத்தை லஞ்சமாகப் பெற்ற ஊழல் வழக்கு தொடர்பான விசாரணையில் அமலாக்கத்துறை அனுப்பிய சம்மனைத் தொடர்ந்து பிகார் முன்னாள் முதல்வர் ராப்ரி தேவி பாட்னாவில் உள்ள அமலாக்கத்துறை அலுவலகத்தில் ஆஜரானார். 

இந்த வழக்கில் குற்றம் சாட்டப்பட்ட பட்லிபுத்ராவைச் சேர்ந்த மக்களவை எம்பி, மூத்த மகள் மிசா பாரதியுடன் ஆர்.ஜே.டி தலைவர் ராப்ரி தேவி வங்கி சாலையில் உள்ள அமலாக்கத்துறைக்கு வந்தார். சம்பவ இடத்தில் நூற்றுக்கணக்கான கட்சித் தொழிலாளர்கள், ஆர்ஜேடி தலைவரைப் புகழ்ந்து கோஷங்களை எழுப்பினர்.

ஆர்.ஜே.டி செய்தித் தொடர்பாளர் எஜாஸ் அகமது கூறுகையில்,

தேர்தல் எதிர்கொள்ளவிருக்கும் மாநிலங்களில் எல்லாம் பாஜக தனது எதிரிகள் மீது மத்திய நிறுவனங்களைக் கட்டவிழ்த்து விடுவது தெளிவாகத் தெரிகிறது. ஜார்க்கண்ட், தில்லியில் அதை ஏற்கனவே பார்த்தோம். இப்போது பிகாரில் ஏவியுள்ளார்கள்.

கடந்த 2004 முதல் 2009-ஆம் ஆண்டு வரையில் ரயில்வே அமைச்சராக லாலு பிரசாத் இருந்தாா். அப்போது தனது குடும்பத்தினர், நெருங்கிய உறவினர்கள், பினாமிகள் பெயரில் லஞ்சமாக நிலங்களைப் பெற்றுக் கொண்டு ரயில்வே பணிகளை ஒதுக்கீடு செய்ததாக லாலு மீது பல்வேறு வழக்குகள் உள்ளன.

இதில் மேற்கு மத்திய ரயில்வே பிரிவில் மத்திய பிரதேசத்தின் ஜபல்பூரில் டி பிரிவு ரயில்வே பணியாளர் நியமனத்தில் இதுபோன்று லஞ்சம் பெற்ற வழக்கில் கடந்த 2022-ஆம் ஆண்டு லாலு பிரசாத், அவரின் மனைவியும் பிகாா் முன்னாள் முதல்வருமான ராப்ரி தேவி, பிகாா் எதிா்க்கட்சித் தலைவராக உள்ள லாலுவின் மகன் தேஜஸ்வி யாதவ், மற்றொரு மகன் தேஜ்பிரதாப் யாதவ், மகள் ஹேமா யாதவ், ரயில்வே அதிகாரிகள், லஞ்சம் பெற முகவா்களாக செயல்பட்ட நபா்கள் மீது வழக்குப் பதிவு செய்யப்பட்டது. இந்த வழக்கு தொடர்பாக தொடர்ந்து விசாரணை நடைபெற்று வருகின்றது.