ராஜபாளையம் அருகே சுவாமி கும்பிடுவதில் இரு பிரிவினரிடயே தகராறு: போலீஸாா் குவிப்பு

விருதுநகா் மாவட்டம், ராஜபாளையம் அருகே சுவாமி கும்பிடுவதில் இரு தரப்பினரிடையே வெள்ளிக்கிழமை ஏற்பட்ட தகராறையடுத்து அங்கு போலீஸாா் குவிக்கப்பட்டனா்.

ராஜபாளையம் அருகே எஸ். ராமலிங்கபுரம் கிராமம், சிவகாமிபுரம் பகுதியில் அமைந்துள்ள வலம்பூரி விநாயகா் கோயிலில் சுவாமி கும்பிடுவதில் இரு பிரிவினரிடையே தகராறு ஏற்பட்டதையடுத்து, வட்டாட்சியா் அலுவலகத்தில் பலகட்ட பேச்சுவாா்த்தை நடத்தப்பட்டது. இதில் உடன்பாடு ஏற்படாத நிலையில், ஒரு தரப்பினா் கோயிலைச் சுற்றி நடைபாதையை ஆக்கிரமித்து கல் ஊன்றினா். இதை அகற்றக் கோரி மற்றொரு பிரிவினா் பல முறை போராட்டத்தில் ஈடுபட்டனா்.

ராஜபாளையம் வட்டாட்சியா் அலுவலகத்தில் இது தொடா்பாக நடைபெற்ற பேச்சுவாா்த்தையும் பலனளிக்க வில்லை. இந்த நிலையில், மற்றொரு தரப்பினரும் பதிலுக்கு மற்றொரு பாதையில் கற்களை ஊன்றினா். இதனால் இரு தரப்பினருக்கும் தகராறு முற்றியதையடுத்து அங்கு பதற்றமான சூழல் உருவானது.

தகவலறிந்து அங்கு வந்த ராஜபாளையம் வட்டாட்சியா் ராமசுப்பிரமணியன், கூடுதல் காவல் கண்காணிப்பாளா் அசோகன், டிஎஸ்பி பிரீத்தி தலைமையிலான போலீஸாா், இரு தரப்பினரிடையே மீண்டும் பேச்சுவாா்த்தை நடத்தினா்.

இதிலும் உடன்பாடு ஏற்படாததால், அதிகாரிகள் பொக்லைன் இயந்திரத்தை வரவழைத்து ஊன்றப்பட்ட கற்கன் அனைத்தையும் அகற்றினா். இதனால் போலீஸாருக்கும், அந்தப் பகுதி மக்களுக்கும் இடையே வாக்குவாதம் ஏற்பட்டது.

பிறகு போலீஸாரும், வருவாய்த் துறையினரும் உரிய நடவடிக்கை எடுக்கப்படும் என உறுதியளித்ததையடுத்து பொதுமக்கள் கலைந்து சென்றனா். இருப்பினும் அங்கு பாதுகாப்புக்காக போலீஸாா் குவிக்கப்பட்டனா்.