அழகும் செல்வமும் தரும் ரம்பா திரிதியை!

பெண்களுக்கு ஐஸ்வரியத்துடன் பேரழகையும் அள்ளித் தரும் விரதம், "ரம்பா திருதியை!' வைகாசி மாத சுக்ல பட்ச திருதியை திதி ரம்பா திருதியை ஆகும். சில சமயங்களில் ஆனி மாதத்திலும்  வருவதுண்டு. கார்த்திகை சுக்ல பக்ஷ திருதியையிலும் சிலர் இவ்விரதத்தைக் கொண்டாடுகின்றனர்.

இவ்வருடம், வரும் 7.6.2016 அன்று இத்திருநாள் கொண்டாடப்படுகிறது. தேவலோக அப்சரஸ்களின் தலைவியான ரம்பா, தான் இழந்த பேரழகை மீண்டும் பெறுவதற்காக, கெüரிதேவியாகிய காத்யாயனியை  வழிபட்ட நன்னாள் இது என்று புராணங்கள் கூறுகின்றன.

அரம்பையர்கள் தேவலோகத்தில் பார்வதிதேவியின் தோழிகளாவர். இவர்கள் பாற்கடலை கடையும் போது தோன்றியதாகக் கூறப்படுகிறது. இவர்கள் மொத்தம் 60,000 பேர் என்பதாகப் புராணங்கள்  கூறுகின்றன. ரம்பை, ஊர்வசி, மேனகை, திலோத்தமை, கிருகத்தலை, சிகத்தலை, சகசந்திசை, பிரமலோசத்தி, அநுமுலோசை, கிருதாசி, விசுவாசி, உருப்பசி, பூர்வசித்தி போன்ற பலர் இருந்தாலும், ரம்பை,  ஊர்வசி, மேனகை, திலோத்தமை போன்றவர்கள்தான் அதிகம் என நமது காவியங்களும், இலக்கியங்களும் கூறுகின்றன. ரம்பை தான் இவர்களின் தலைவியாக கூறப்படுகிறாள்.

அரம்பையர்களுக்கு அப்சரஸ் என்ற பெயரும் உண்டு. அப்ஜம் என்றால் தாமரை. சரஸ் என்றால் தடாகம், குளம் என்று பொருள். அப்சரஸ் என்றால் தடாகத்தில் தோன்றிய தாமரை எவ்வளவு  அழகாகவும், மனதுக்கு மகிழ்ச்சியாகவும் இருக்குமோ அவ்வளவு அழகு நிரம்பியவர்கள் அரம்பியர்கள் ஆவர். இவர்கள் தங்களுக்கென்று ஓர் இடம் வேண்டும் எனவும், தாங்கள் என்றும் இளமை  மாறாமல் இருக்க வேண்டும் எனவும் சிவனிடம் வரம் வேண்ட, அவரும் அவ்வரங்களை அளித்து, அவர்களுக்காக "அப்சரஸ்' எனும் லோகத்தையும் உருவாக்கி கொடுத்தார். இவர்கள், சிவ பூஜை  செய்வதுடன், யாழ் இசை மீட்டுவதிலும் நடனம் ஆடுவதிலும் பாடல்கள் பாடுவதிலும் வல்லவர்களாய் விளங்கினர்.

ஒருமுறை தேவசபையில் ரம்பை, ஊர்வசி, மேனகை இவர்களுக்கிடையே நடந்த நடனப் போட்டியின்போது, தேவலோக பேரழகி என்ற தனது பட்டத்தைத் தக்க வைத்துக்கொள்ள எண்ணிய ரம்பை,  அரங்கமே அதிரும்படி ஆக்ரோஷமாக ஆடினாள். அப்போது அவள் அணிந்திருந்த நெற்றிப் பொட்டும் பிறைச் சந்திரனும் கீழே விழ, நிலைகுலைந்த அவள், கீழே விழுந்த அணிகலன்களை எடுத்துக்  கொண்டு, அழுதபடியே அரங்கை விட்டு வெளியேறினாள். இந்தக் காட்சியைக் கண்ட ஊர்வசியும் மேனகையும் ரம்பையைப் பார்த்து ஏளனமாகச்

சிரித்தனர்.

மறுநாள், அவள் இந்திரனைச் சந்தித்தபோது, முதல் நாள் ஆட்டத்தின்போது அவள் விதிமுறைகள் மீறி ஆடியதால் அதைப் பார்க்க சகிக்காமல் கலைவாணி, அவளுடைய பிறைச் சந்திரனையும், அலங்கார  பொட்டையும் கீழே விழ வைத்துவிட்டாள் என்று கூற, ரம்பையும் தனது தவறான ஆட்டத்திற்கு வருந்தி, அதற்குச் சரியான பிராயச்சித்தத்தைக் கூற வேண்டினாள். தேவேந்திரனும் அவள் துயர் தீர்க்க  விரும்பி, பூலோகத்தில், தன் பதியைத் தேடிச்சென்ற பார்வதிதேவி, கெüரி அன்னையாக அவதரித்து, ஒரு மகிழ மரத்தின் கீழ் தவமிருப்பதாகவும் அவளை விரதமிருந்து வழிபட்டால், அவளருளால்  ரம்பைக்கு நேர்ந்துள்ள களங்கமும் தீரும் என கூறினான். அதன்படி, பூலோகம் வந்த ரம்பைக்கு கெüரிதேவியின் தரிசனம் கிடைத்தது.

அமாவாசைக்கு இரண்டாவது நாளான துவிதியை அன்று, மஞ்சள் பிரதிமையில் அம்பிகையை ஆவாஹனம் செய்து, விரதம் இருந்து பூஜை செய்தாள் ரம்பை. முறையாக ரம்பை செய்த பூஜையை ஏற்றுக்  கொண்ட கெüரிதேவி, மறுநாள் சுந்தர ரூபனான முருகனை மடியில் வைத்தபடி கார்த்தியாயினியாக, பொன்மேனியளாகக் காட்சி தந்தார். மேலும், ரம்பையின் பூஜையில் மகிழ்ந்த தேவி, மீண்டும்  தேவலோகத்தில் முதல் அழகியாகும்படி அவளுக்கு அருள்புரிந்ததோடு, அவளது அழகும் ஐஸ்வரியங்களும் மேலும் வளர ஆசி கூறினார். மேலும் அவள் மேற்கொண்ட இந்த விரதத்தை அவளது  பெயரால் "ரம்பா திருதியை' என்று வழங்கப்படுமெனவும், இதனைப் பெண்கள் அனுஷ்டித்தால் அவர்களது அழகும் செல்வமும் அதிகரிக்குமென்றும் அருளினாள்.

ரம்பா என்றால் வாழை என்ற அர்த்தமும் உண்டு. எனவே நாலாபுறமும் வாழை மரங்கள் கட்டி, நடுவில் தேவியின் பிரதிமை அல்லது படம் வைத்து நன்கு அலங்கரித்து, பூஜை செய்து, அம்பிகையின்  பாடல்களைப் பாடி, நிறைய வாழைப் பழங்களையும் பட்சணங்களையும் நிவேதனம் செய்து, பெண்கள், குழந்தைகள் உட்பட எல்லோருக்கும் அவற்றை தானம் செய்து பூஜையை நிறைவு செய்வர்.  பெண்கள் தனியாகவோ கணவருடன் சேர்ந்தோ இந்த ரம்பா விரதம் அனுஷ்டிக்கலாம். இந்த பூஜையினால் நல்ல துணை, நீண்ட ஆயுள், நல்ல குழந்தை, நல்ல வீடு முதலியவற்றை அடைவார்கள்  என்கிறது பவிஷ்யோத்தர புராணம்.

திருப்பைஞ்ஞீலி என்ற திருத்தலத்தில் பார்வதி சிவபெருமானை வழிபட வந்த போது, அரம்பையர்கள் வாழை மரங்களாக மாறி நிழல் தந்து உதவி, அவர்களது அருளைப் பெற்றனர். வாரணாசியில்  மேனகையும், திருக்கழுக்குன்றத்தில் திலோத்தமையும், சிவபெருமானை வழிபாடு செய்து அருள் பெற்றனர். திருநீலக்குடி, பந்தநல்லூர் போன்ற இடங்களிலும் பல அரம்பையர்கள் வழிபாடு செய்து அருள்  பெற்றதாக தலபுராணங்கள் குறிப்பிடுகின்றன.

பாற்கடலில் தோன்றிய இவர்களை வழிபட்டால் மகிழ்ச்சியும் செல்வமும் இளமைத் தோற்றமும் கிட்டும் என்று புராணம் சொல்கிறது.

- ரஞ்சனா பாலசுப்ரமணியன்